Hodgson: Vorum alltaf á góðri leið þrátt fyrir vonbrigðin á HM

Roy Hodgson, landsliðsþjálfari Englands í fótbolta, er ánægður með þróun liðsins og segir það hafa verið að bæta sig meira að segja fyrir vonbrigðin á HM í Brasilíu.

England var sent heim eftir riðlakeppnina á HM þar sem það vann ekki leik, en er nú búið að vinna fimm leiki í röð, þar af alla fjóra leikina í undankeppni EM 2016. Liðið er með sex stiga forystu í sínum riðli eftir 3-1 sigur á Slóvenum um helgina.

„Við vorum að gera marga hluti rétt fyrir HM í Brasilíu, en þar fengum við vissulega blauta tusku í andlitið. Sagt var að við færum aftur á byrjunarreit en ég var ekki sammála því,“ sagði Hodgson á blaðamannafundi fyrir vináttuleik Englands og Skotlands sem fram fer í kvöld.

Vonbrigðin í Brasilíu sannfærðu Hodgson um að gefa yngri leikmönnum enska landsliðsins meiri ábyrgð í liðinu. Raheem Sterling er orðinn algjör lykilmaður, Jack Wilshere á fæst sæti á miðjunni og Ross Barkley er að negla sér sæti í byrjunarliðinu.

„Margir leikmenn voru að banka á dyrnar fyrir HM, leikmenn sem voru ekki komnir alla leið. Ég vil meina að sumir þessara leikmanna hafi sýnt af hverju við berum fullt traust til þeirra,“ segir Roy Hodgson.