Eðlilegt að Di María hafi tekið smá dýfu

Gerardo „Tata“ Martino, landsliðsþjálfara Argentínu, finnst Ángel Di María, leikmaður Manchester United, fá of harða gagnrýni fyrir frammistöðu sína með enska liðinu í síðustu leikjum.

Di María byrjaði frábærlega á Old Trafford, en hann skoraði þrjú mörk og lagði upp fjögur í fyrstu sex leikjum sínum með liðinu eftir komuna frá Real Madrid. Hann hefur síðan þá tekið smá dýfu.

Martino fannst byrjun hans í raun frekar óeðlileg og líkjast frekar leikmanni sem hefur verið lengi hjá liðinu en ekki leikmanni sem var að koma í nýja deild.

„Byrjun hans var mögnuð og sérstaklega í ljósi þess að hann er að venjast nýrri deild, nýju liði, nýjum samherjum og nýrri spilamennsku. Mér finnst frammistaða hans í síðustu leikjum í raun eðlilegri fyrir leikmann sem er að koma til nýs liðs,“ sagði Martino fyrir leik Portúgal og Argentínu sem fram fer á Old Trafford í kvöld.

Martino fór fögrum orðum um Di María sem hann segir geta spilað margar stöður. Hann kynntist því þegar hann stýrði Barcelona á síðustu leiktíð í El Clásico-leikjunum gegn Real Madrid.

„Maður þarf bara að horfa nokkrar leiktíðir aftur í tímann þegar hann var að spila á hægri kantinum hjá Real Madrid. Svo á síðustu leiktíð var hann að spila vinstra megin inn á miðjunni í frjálsara hlutverki,“ segir Gerardo Martino.

„Á HM stóð hann sig svo frábærlega á vinstri kantinum þannig það skiptir í raun ekki máli hvar hann spilar. Hann getur aðlagast hvaða stöðu sem er.“