Van Gaal: Þetta gæti tekið meira en eitt ár, jafnvel þrjú

Louis van Gaal, knattspyrnustjóri Manchester United, hélt blaðamannafund í dag þar sem hann fór yfir leik helgarinnar á móti Crystal Palace í ensku úrvalsdeildinni.

Hollenski stjórinn viðurkenndi á fundinum að honum líði illa vegna slaks gengi United-liðsins sem hefur aðeins náð í 13 stig út úr fyrstu tíu leikjunum sem versta byrjun United síðan 1986.

„Þetta er ekki nógu gott en þetta er í ferli. Það gæti tekið meira en eitt ár og jafnvel þrjú ár," sagði Louis van Gaal sem eyddi 150 milljónum punda í nýja leikmenn í sumar og haust.

„Ég er viss um að þegar þetta hrekkur í gang hjá okkur þá munum við vinna marga leiki í röð. Fólk hefur trú á því sem við erum að gera og hvernig liðið er að spila," sagði Louis van Gaal en hann var frekar þungur á fundinum í dag.

Louis van Gaal staðfesti einnig að þeir Radamel Falcao, Jonny Evans og Phil Jones verði ekki með í leiknum á móti Crystal Palace og þá þarf Marcos Rojo ekki að fara í uppskurð vegna axlarmeiðslanna sem hann varð fyrir á móti Manchester City.  Það eru þó ennþá sex vikur í argentínska varnarmanninn.

Manchester United er í tíunda sæti deildarinnar eftir tíu leiki en liðið er heilum þrettán stigum á eftir toppliði Chelsea.