Rodgers: Staðan getur versnað áður en hún batnar

Brendan Rodgers knattspyrnustjóri enska úrvalsdeildarliðsins Liverpool segir stöðu liðsins í ensku úrvalsdeildinni geta versnað áður en hún batnar en liðið vann síðast sigur í deildinni 31. ágúst.

Að auki við að hafa átt í vandræðum í deildinni tapaði liðið fyrir Basel í Sviss í vikunni í Meistaradeild Evrópu í leik þar sem liðið náði sér engan vegin á strik.

Liverpool fær WBA í heimsókn í ensku úrvalsdeildinni í dag klukkan 14 í beinni útsendingu Stöðvar 2 Sport 2 en WBA vann 4-0 sigur á Burnley um síðustu helgi.

„Þetta er erfitt fyrir stuðningsmennina. Ég skil það,“ sagði Rodgers á blaðamannafundi fyrir leikinn í dag.

„Það hlýtur að vera erfitt að horfa á lið sem var svo léttleikandi og kraftmikið síðustu 18 mánuði. Nú sjá stuðningsmenn lið sem líkist því ekki marga vegu.

„Leikur okkar snýst að miklu leiti um að halda boltanum en einnig um að sækja hratt þegar hann vinnst. Við erum ekki hættulegir þessa stundina,“ sagði Rodgers sem gæti tekið Mario Balotelli úr byrjunarliði Liverpool í dag en Ítalinn umdeildi hefur ekki náð sér á strik með Liverpool í fyrstu leikjum sínum fyrir félagið.

„Þessi sársauki er í núinu. Við misstum hágæða leikmann (Luis Suarez) og fengum aðra leikmenn til að hjálpa okkur núna og í framtíðinni. Þegar þessir leikmenn aðlagast og skilja út á hvað við göngum þá munum við komast aftur þangað sem við vorum.

„Það eru auðvitað svekkelsi núna. Enginn virðir það meira en ég. Við verðum að vinna vel og aðlaga nýju leikmennina. Þetta eru leikmenn sem ég held að verði frábærir en það tekur stundum smá tíma,“ sagði Rodgers.