Mourinho sér ekki eftir að hafa skotið á Wenger

Jose Mourinho knattspyrnustjóri Chelsea í ensku úrvalsdeildinni í fótbolta sér ekki eftir að hafa kallað Arsene Wenger stjóra Arsenal sérfræðing í mistökum fyrir leik liðanna á síðustu leiktíð.

Chelsea tekur á móti Arsenal í beinni útsendingu Stöðvar 2 Sport 2 í dag klukkan 13.

Mourinho sér ekki ástæðu til að biðjast afsökunar á umælunum umdeildu frá síðustu leiktíð þegar Portúgalinn gerði grín að titlaþurð Arsenal sem þó varð bikarmeistari í lok síðustu leiktíðar.

„Það sem ég sagði var framhald af atburðarrás. Ég fékk ekki afsökunarbeiðni þannig að ég biðst ekki afsökunar,“ sagði Mourinho.

„Þetta var ekki eitthvað sem ég sagði fyrst. Við gleymum þessu og horfum áfram án þess að hugsa til baka.

„Það er engin ástæða til að biðjast afsökunar. Gáfað fótboltafólk þarf þess ekki. Við klárum þetta og höldum áfram,“ sagði Mourinho en Wenger og Mourinho hefur ekki verið vel til vina allt frá því þeir tókust á tímabilið 2005.