Draumamark Jagielka tryggði Everton stig | Sjáið mörkin

Everton stal stigi á Anfield Road í Liverpool í hádegisleik ensku úrvalsdeildarinnar í fótbolta. Phil Jagielka tryggði Everton 1-1 jafntefli á heimavelli Liverpool með ótrúlegu marki í uppbótartíma.

Liverpool hóf leikinn af miklum krafti og sótti mikið og hefði getað verið komið yfir áður en Everton komst inn í leikinn eftir rúmlega 20 mínútna leik.

Liverpool var mun hættulegra liðið en átti í vandræðum með að skapa sér afgerandi færi þó liðið væri mikið með boltann í kringum vítateig Everton.

Eftir markalausan en fjörugan fyrri hálfleik gerðist fátt markvert þar til Steven Gerrard kom Liverpool yfir með marki úr aukaspyrnu þegar 25 mínútur voru eftir af leiknum.

Mario Balotelli fékk besta færi leiksins til að koma Liverpool í 2-0 en brást bogalistin af þriggja metra færi og reyndist það heldur betur dýrkeypt.

Jagielka jafnaði metin í uppbótartíma með ótrúlegu marki, viðstöðulausu skoti í slána og inn af 20 metra færi.

Liverpool er með 7 stig eftir sex leiki og Everton er stigi á eftir.