Redknapp vill sjá sérstakar höfuðhögga-skiptingar

Harry Redknapp, knattspyrnustjóri Queens Park Rangers, leggur til að enska úrvalsdeildin taki það upp að leyfa tímabundnar skiptingar verði leikmenn liðanna fyrir höfuðmeiðslum.

Redknapp talaði um þetta eftir tapið á móti Southampton í ensku úrvalsdeildinni um helgina en hann þurfti þá að taka Sandro af velli eftir aðeins ellefu mínútur í framhaldi af því að Brasilíumaðurinn fékk höfuðhögg.

Sandro hefði getað komið aftur inn á völlinn seinna í hálfleiknum en það var of seint. „Þú getur ekki beðið í tíu eða fimmtán mínútur með tíu menn á móti ellefu. Það er bara ekki hægt og það þýðir að læknar liðsins fá ekki nægan tíma til að skoða leikmanninn," sagði Harry Redknapp.

„Það væri ekki versta hugmynd í heimi að skoða möguleikann á tímabundnum skiptingum á meðan læknarnir fá sinn tíma til að skoða leikmanninn. Læknarnir verða að fá sinn tíma því þeir þurfa að fara að öllu með gát. Þeir gætu nefnilega lega verið í miklum vandræðum ef eitthvað færi úrskeiðis," sagði Redknapp.

„Það var ekki mikið að Sandro í hálfleik. Hann var í góðum gír í klefanum en auðvitað þurftu læknarnir að vera fullvissir um að hann væri í lagi," sagði Redknapp.