Leiðtogar bresku flokkanna halda til Skotlands

Leiðtogar þriggja stærstu flokkanna í Bretlandi munu halda til Skotlands til að styðja við bakið á kosningabaráttu sambandssinna í aðdraganda kosninganna um mögulegt sjálfstæði Skotlands sem fram fara þann 18. september.

David Cameron, forsætisráðherra og formaður Íhaldsflokksins, og Ed Miliband, formaður Verkamannaflokksins, hafa aflýst vikulegum fyrirspurnartíma í þinginu vegna málsins. Nick Clegg, aðstoðarforsætisráðherra og formaður Frjálslynda flokksins, mun einnig taka þátt í baráttunni og reyna að koma í veg fyrir að þetta 307 ára samband renni sitt skeið á enda.

Í frétt BBC segir að Alex Salmond, leiðtogi skoskra sjálfstæðissinna, segi þremenningana vera þá bresku leiðtoga sem notið hafa minnst trausts í sögunni og spáir því að heimsókn þeirra til Skotlands muni einungis auka á stuðning við sjálfstæði landsins.

Salmond skoraði á Cameron í kappræður fyrir kosningarnar sem fram fara á fimmtudaginn eftir rúma viku. Nýlegar skoðanakannanir benda til þess að hnífjafnt sé milli fylkinga.

Cameron biðlaði til Skota að vera áfram í sambandi við Breta í grein sem birtist í Daily Mail í dag. Sagði Cameron að farsæl framtíð Skotlands væri ekki einungis háð áframhaldandi sambandi við Bretland, heldur einnig að þeir öðluðust aukin völd í eigin málum.

Cameron sagði í greininni Bretland vera dýrmætt og sérstakt land. „Þetta er það sem er í húfi. Enginn í Skotlandi ætti að vera í vafa um það. Við viljum sárlega að þið verðið áfram með okkur; við viljum ekki að þessi fjölskylda þjóða sundrist,“ og bætti svo við að ef Bretland sundraðist, þá yrði breytingin varanleg.