Rooney: Frábært að spila með Sterling

Wayne Rooney, nýskipaður fyrirliði enska landsliðsins, segir að liðið geti spilað mun betur en það gerði í 1-0 sigri á Noregi á Wembley í gær.

„Mér fannst við geta gert betur. Við getum allir spilað betur,“ sagði Rooney í samtali við ITV Sport eftir leikinn.

„En þetta var fyrsti leikurinn eftir HM og það var mikilvægt að ná sigri fyrir leikinn gegn Sviss á mánudaginn,“ bætti fyrirliðinn við, en England og Sviss eru í riðli með Slóveníu, Eistlandi, San Marinó og Litháen í undankeppni EM 2016.

Rooney sá þó ýmislegt jákvætt við Noregsleikinn: „Mér fannst við láta boltann ganga vel í fyrri hálfleik. Þeir gerðu okkur erfitt fyrir með því að liggja til baka, en við sköpuðum okkur einhver færi.

„Byrjunin á seinni hálfleik var ekki nógu góð sem voru vonbrigði því við vildum sækja á þá. En við náðum að vinna,“ sagði Rooney sem hrósaði Raheem Sterling, leikmanni Liverpool, sem átti góðan leik í gær.

„Hann er ógnandi. Hann fær boltann og sækir á varnir andstæðinganna. Það tekst ekki alltaf, en hann er spennandi leikmaður sem lætur hlutina gerast. Það er frábært að spila með honum.“