Ramsey: Vil bara þakka Wenger traustið

Aaron Ramsey, miðjumaður Arsenal, skoraði eitt af þremur mörkum Arsenal þegar liðið vann Englandsmeistara Manchester City, 3-0, í leiknum um Samfélagsskjöldinn á Wembley í dag.

Síðasti leikur Ramseys og Arsenal á Englandi var einmitt á Wembley þegar liðið tryggði sér bikarmeistaratitilinn, en Walesverjinn skoraði sigurmarkið í framlengingu gegn Hull.

Spánverjinn Santi Cazorla skoraði einnig í bikarúrslitaleiknum líkt og í dag, en þriðja markið skoraði Oliver Giroud.

„Wembley hefur ekki reynst okkur Santi Cazorla slæmur staður. Við værum til í að spila hérna í hverri viku,“ sagði Ramsey við BT Sport eftir leikinn.

Ramsey fór hamförum framan af tímabili í fyrra og skoraði eins og óður maður. Hann vill þakka Arsene Wenger fyrir allt það traust sem hann hefur fengið frá Frakkanum.

„Arsene Wenger hefur reynst mér svakalega vel. Hann hefur alltaf haft trú á mér, meira að segja þegar illa gékk. Hann notar mig í hverri viku og fyrir það er ég þakklátur og vill laun honum traustið,“ sagði Ramsey.

„Stjórinn leyfir mér að spila þar sem hann veit að ég mun taka hlaup inn í teiginn. Mér líður vel í þessari stöðu og mér finnst ég vera að taka réttu hlaupin.“