Rodgers hefur trú á Lambert

Brendan Rodgers, þjálfari Liverpool, segir að framherjinn Rickie Lambert sé ekki undir neinni pressu, þótt honum hafi mistekist að skora á undirbúningstímabilinu.

„Ekki setja pressu á Lambert að skora mörk. Hann var fenginn hingað til að sinna mikilvægu hlutverki,“ sagði Rodgers.

„Hann hefur alltaf sannað sig. Hann hefur skorað mörk alls staðar þar sem hann hefur spilað, bæði með enska landsliðinu og Southampton.

„Hann er mikill aðdáandi Liverpool, en hann er meira en það. Ég treysti honum til að standa sig og ég veit að hann á eftir að gera góða hluti,“ sagði Rodgers sem keypti Lambert á fjórar milljónir punda eftir síðasta tímabil.

Lambert gerði tveggja ára samning við Liverpool, en hann var á mála hjá félaginu sem unglingur.