Enski boltinn: Sumarið hjá Arsenal

"Ég er svo ánægður að vera kominn til félags sem er með frábæran þjálfara, framúrskarandi leikmannahóp og nýtur mikils stuðnings um allan heim," sagði framherjinn Alexis Sanchez hæstánægður, eftir að félagsskipti hans frá Barcelona til Arsenal voru gengin í gegn.

Vísir mun næstu daga fara yfir stöðu mála hjá liðunum í ensku úrvalsdeildinni en nýtt tímabil hefst þann 16. ágúst.

Talið er að Sanchez, sem spilaði frábærlega með Chile á HM í Brasilíu, hafi kostað Arsenal um 35 milljónir punda, sem gerir hann að dýrasta leikmanni sem enskt lið hefur keypt það sem af er sumri.

Sanchez er annar af tveimur leikmönnum sem hafa gengið til liðs við Arsenal í sumar. Hinn er Frakkinn Mathieu Debuchy sem var keyptur frá Newcastle.

Debuchy er ætlað að fylla skarð landa síns, Bacary Sagna, í hægri bakvarðarstöðunni, en sá síðarnefndi fór til Manchester City á frjálsri sölu fyrr í sumar.

Þrátt fyrir þetta segist Arsene Wenger, sem hefur stýrt Arsenal frá því í september 1996, hvergi nærri hættur á leikmannamarkaðnum, en meðal leikmanna sem hafa verið orðaðir við Arsenal eru Sami Khedira, leikmaður Real Madrid og nýkrýndur heimsmeistari með Þjóðverjum, og kólumbíski markvörðurinn David Ospina.

Komnir:

Alexis Sanchez frá Barcelona

Mathieu Debuchy frá Newcastle

Farnir:

Chuks Aneke til Zulte-Waregem

Zak Ansah til Charlton

Lukasz Fabianski til Swansea City

Wellington Silva til Almeria (á láni)

Bacary Sagna til Manchester City

Nicklas Bendtner samningslaus

Chu Young Park samningslaus

Daniel Boateng samningslaus

Lender Siemann samningslaus