Skeifubruninn: „Því meira sem brennur því meiri reykur“

„Það hefur brunnið í þessu húsi áður,“ segir Bjarni Kjartansson, sviðstjóri forvarnarsviðs slökkviliðs höfuðborgarsvæðisins um brunann í Skeifunni 11. En tilkynnt var um hann á níunda tímanum í kvöld og allt tiltækt slökkvilið sent á staðinn. „Það brann alveg mjög illa en það var reyndar fyrir mína daga.“

Þá var í húsinu Persía teppaverslun og segir Bjarni þetta hafa gerst í kringum 1970. Hann segir byggingarnar einstaklega viðkvæmar fyrir hita.

Þrátt fyrir að þær séu gamlar og viðkvæmar hefur öllum reglum verið fylgt.  „Ekkert sem hefur klagað sérstaklega upp á þetta hús í eldvarnarskoðun.“ Hann segir þó að ef húsið yrði byggt núna yrði það sérstaklega brunahannað og sérstakt vatnsúðakerfi sett í bygginguna.

„Magnið af reyk myndast í samhengi við það sem er að brenna. Því meira sem brennur því meiri reykur,“ útskýrir Bjarni spurður hvers vegna reykjarmökkurinn sé svo stór. Svarti liturinn stafar hins vegar af þeim efnum sem eru að brenna. Þegar olíuefni, plast, gúmmí brenna í miklu magni þá verður liturinn svona dökkur.