United gerir Bayern tilboð í Schweinsteiger

Manchester United ætlar að gera Bayern München 20 milljóna punda tilboð í þýska miðjumaninn Bastian Schweinsteiger, samkvæmt knattspyrnuvefnum Goal.com.

Schweinsteiger er einn af þeim mönnum sem Louis Van Gaal vill hvað mest fá til United en á innkaupalistanum eru einnig menn á borð við Hollendinginn Kevin Strootman og þýska varnarmanninn MatsHummels.

Ed Woodward, framkvæmdastjóri Manchester United, sem var eðlilega gagnrýndur fyrir skelfilega frammistöðu á félagaskiptamarkaðnum í fyrra, er byrjaður að elta uppi þá menn sem Van Gaal vill fá til félagsins.

Schweinsteiger er goðsögn í lifanda lífi hjá Bayern og óvíst að hann vilji fara en United vill láta reyna á hvort þessi 29 ára gamli þýski landsliðsmaður hafi áhuga á að leika aftur undir stjórn Van Gaals sem gerði Bayern að Þýskalandsmeisturum.

Þar sem hann nálgast nú þrítugt gæti þetta einnig verið síðasta tækifærið fyrir Bayern að fá eitthvað fyrir miðjumanninn sem er þessa dagana að undirbúa sig fyrir HM í Brasilíu sem hefst á morgun.