Formaður samninganefndar sakar Samtök atvinnulífsins um óbilgirni

Formaður samninganefndar flugvirkja segist hæfilega bjartsýnn fyrir fund deiluaðila í dag. Hann segir að aukin harka sé hlaupin í deilurnar og að litlar líkur séu á að fundurinn í dag komi í veg fyrir vinnustöðvunina á morgun.

Sólahringsvinnustöðvun flugvirkja hjá Icelandair hefst á morgun og nú þegar hefur tólf flugferðum hjá fyrirtækinu verið aflýst. Maríus Sigurjónsson, formaður samninganefndar flugvirkja segist stilla væntingunum í hóf fyrir fundinn í dag.

„Maður er kannski hæfilega bjartsýnn þegar það er komið út í svona aðstæður eins og núna. Við verðum bara að bíða og sjá til,“ segir Maríus.

Hvernig aðstæður áttu við?

„Þegar það er komið út í verkfallsaðgerðir sem virðast vera óumflýjanlegar þá hleypur kannski smá harka í menn. Í okkar huga er samt alltaf opið fyrir lausn.“

Maríus segir að það sé mikil einföldun að halda því fram að krafa flugvirkja sé 30 prósent launahækkun.

„Nei, ég hef tekið eftir því að það hefur verið hamrað á því í fjölmiðlum en þeir hafa neitað að viðurkenna það að þessar viðræður hafa alltaf snúist um meira en bara framlengingu á samningnum. Við höfum verið að reyna að koma því á framfæri að um er að ræða töluvert mikla hagræðingu fyrir fyrirtækið líka samfara breyttu vinnufyrirkomulagi og svoleiðis. Ég held að þeir séu að einfalda málið allt of mikið og ekki setja það rétt fram í rauninni.

Ljóst er að tap þjóðarbúsins verður mikið ef verkfallið dregst á langinn. Maríus segir að flugvirkjar finni vissulega fyrir þeirri mikilvægu ábyrgð sem hvílir á þeirra herðum.

Það sem mér finnst kannski fljóta svolítið ofan á í umræðunni er í rauninni óbilgirni Samtaka atvinnulífsins og vil ég skilja þar á milli, það er á milli Samtaka atvinnulífsins og Icelandair. Samningsumboðið liggur hjá Samtökum atvinnulífsins og þeir hafa verið frekar erfiðir í þessu.