Flugvirkjar vonast til að samningar náist

Flugin eru 65 talsins og um 12 þúsund farþegar áttu bókað flug með félaginu þennan dag.

Í yfirlýsingu frá Icelandair segir meðal annars að útilokað sé fyrir félagið að ganga að ítrekuðum kröfum flugvirkja um margfallt meiri launahækkun en samstarfsmenn þeirra hafi nýverið samið um.

Þetta segja flugvirkjar vera einföldun á stöðu mála.

„Það er rétt að við erum að fara fram á launahækkun, en það er hluti af stærra samhengi. Við erum að ræða allt aðra hlui, vinnufyrirkomulag, vaktir og annað. Þetta eru stærri og flóknari atriði en samið er um í venjulegum fleytisamningum, sem gerðir hafa verið á markaðnum undanfarið, svo það er kannski ekki óeðlilegt að þetta taki lengri tíma," sagði Maríus Sigurjónsson, varaformaður Flugvirkjafélags Íslands og formaður samninganefndar.

„Við viljum meina að það tilboð sem við höfum lagt fram sé sanngjarnt. Okkur finnst við einnig sýna samstarfsvilja í því að vilja semja til tveggja til þriggja ára.

Samningafundi var slitið í húsakynnum ríkissáttasemjara fyrr í dag og næsti fundur ekki áætlaður fyrr en á sunnudaginn kemur. Það getur varla verið góðs viti?

„Nei það er það ekki. Við hefðum gjarnan viljað halda áfram að funda í dag," segir Maríus.

Hann segir flugvirkja vissulega hafa samúð með öllum þeim sem ákvörðun Icelandair eigi eftir að hafa áhrif á, en launþegar verði að fá að nýta sér lögbundinn verkfallsrétt gangi illa að semja um kaup og kjör.

Maríus segir að flugvirkjar yrðu vonsviknir, ákveði stjórnvöld að setja lögbann á fyrirhugaðar verkfallsaðgerðir.

„Ég vil minna á að sett var lögbann á fyrirhugaðar verkfallsaðgerðir flugvirkja árið 2010, svo mér finnst það vera að bera í bakkafullan lækinn að gera það aftur svo stuttu síðar