Vinnudeilur valda skaða

Ferðaþjónusta Innan ferðaþjónustunnar telja menn að vinnudeilur flugvallarstarfsmanna, flugmanna, flugfreyja og flugvirkja hafi valdið miklum skaða. Orðspor landsins sem ferðamannalands hafi beðið talsverðan hnekki.

Verulega hægði á bókunum um leið og fréttist af því að flugvirkjar ætluðu að boða verkföll. „Áður en flugmenn hófu aðgerðir fyrr í vor hættu ferðamenn að bóka viku, tíu dögum áður og það sama er uppi á teningnum núna. Menn hætta að bóka af ótta við verkfall flugvirkja,“ segir Einar Bollason, eigandi Íshesta.

Aðrir í ferðaþjónustu taka í sama streng. „Það bókast mjög hægt þessa dagana,“ segir Ingibjörg Guðjónsdóttir, framkvæmdastjóri Fjallaleiðsögumanna.

Það var búið að spá því að þetta sumar yrði mesta ferðamannasumar allra tíma. Það sem af er hefur tímabilið hins vegar einkennst af verkfallshótunum og verkföllum. Í apríl hófu flugvallarstarfsmenn aðgerðir, flugmenn hófu aðgerðir 9. maí og flugfreyjur boðuðu verkfall en áður en til þess kom tókust samningar. Nú eru það flugvirkjar sem standa í kjaradeilum.

„Ég ætla ekki að gera lítið úr verkfallsréttinum en ég held að hann hafi ekki verið fundinn upp til að halda heilli atvinnugrein í heljargreipum. Fámennar stéttir eru að stefna lífsafkomu þúsunda annarra í hættu,“ segir Kristján Daníelsson, framkvæmdastjóri Kynnisferða.

Menn segjast eiga erfitt með að meta það tjón sem þeir hafi orðið fyrir. Einar Bollason áætlar þó að Íshestar hafi orðið fyrir 50 til 60 milljóna króna beinu tjóni. Katla Travel telur sitt tjón 40 til 50 milljónir, Íslandshótel telja að tjón þeirra nemi 30 til 40 milljónum króna og Fjallaleiðsögumenn segja sitt tjón hlaupa á milljónum. Samtök atvinnulífsins áætluðu í vor að þegar samgöngur til og frá landinu lömuðust vegna verkfalla flugmanna næmi heildartjónið um milljarði á dag. Tjónið sem verður á mánudag verður mun meira enda hefur það áhrif á ferðaplön 12 þúsund ferðalanga.

Þeir sem Fréttablaðið ræddi við voru þó sammála um að þó að fjárhagslegt tjón væri slæmt þá væri enn verra að trúverðugleiki landsins sem ferðamannalands hefði beðið hnekki. „Við missum trúverðugleika. Langtímaáhrifin eru verst, kostnaðurinn við að vinna trúverðugleikann til baka verður upp á hundruð milljóna króna,“ segir Kristján Daníelsson.

Þorsteinn Þorgeirsson, framkvæmdastjóri bílaleigunnar ALP, tekur í sama streng. „Ef umræðan úti í heimi fer öll að snúast um að það sé ekki hægt að koma til Íslands vegna stöðugra verkfalla skaðar það okkur til framtíðar. Það getur reynst erfitt að vinda ofan af slíkri umræðu. Það er enginn tilbúinn að gambla með fríin sín,“ segir Davíð Ólafsson, framkvæmdastjóri Íslandshótela.