Büttner á leið til Rússlands

Umboðsmaður Alexander Büttner segir að kappinn muni ekki spila undir stjórn Louis van Gaal hjá Manchester United.

Hann segir að líklegast sé að bakvörðurinn endi hjá Dinamo Moskvu í Rússlandi en Büttner kom til United árið 2012.

„Dinamo Moskva er með stórar og miklar áætlanir. Það er ekki möguleiki að hann verði áfram í Manchester,“ sagði umboðsmaðurinn.

Van Gaal var í vor ráðinn stjóri Manchester United en hann hefur undanfarin tvö ár stýrt hollenska landsliðinu. Büttner hefur ekki hlotið náð fyrir augum hans þar.

„Van Gaal hefur hunsað hann aftur og aftur undanfarin tvö ár. Hvaða möguleika ætti hann ef hann yrði einnig þjálfari félagsliðs hans?“