Útiloka ekki verkfallsaðgerðir á ný eftir mánuð

Ríkisstjórnin hugsar sig vonandi tvisvar um áður en hún tekur við pöntuðum tillögum frá viðsemjendum okkar, segir formaður samninganefndar flugvirkja sem hættu við að fara í verkfall á síðustu stundu í gærkvöld. Hann útilokar ekki að boðað verði til verkfallsaðgerða á ný, strax í næsta mánuði náist ekki að semja við Icelandair.

Alþingi var kallað saman til þingfundar í gær þar sem lagasetning vegna verkfalls flugvirkja var til umræðu. Þingfundur hófst klukkan þrjú en um hálftólf, skömmu áður en atkvæðagreiðsla um frumvarpið átti að fara fram, steig Hanna Birna Kristjánsdóttir innanríkisráðherra í pontu þar sem hún tilkynnti að flugvirkjar væru hættir við verkfallsaðgerðir sínar.

Formaður samninganefndar flugvirkja segir að eftir að hafa fylgst með umræðunni á Alþingi í gær hafi honum þótt augljóst að engum af kröfum flugvirkja yrði mætt. Að hætta við verkfallið og sleppa þar með við lögin gefist þeim nú tækifæri til að semja og það sem meira er, verkfallsvopnið er enn í þeirra höndum. En hvað kemur í veg fyrir að því verði beitt strax í næstu viku?

„Við áttum samtal við Hönnu Birnu Kristjánsdóttur innanríkisráðherra og ég gaf henni mitt orð um að ég myndi alla vega láta mánuð líða áður en við íhuguðum frekari aðgerðir,“ segir Maríus Sigurjónsson, formaður samninganefndar flugvirkja.

Guðjón Arngrímsson, upplýsingafulltrúi Icelandair er hæfilega bjartsýnn á að samningar takist.

„Það er auðvitað bara unnið að því að leysa málið. Það er í sjálfu sér ekkert hægt að segja mikið meira um það. Það er í hendi sáttasemjara í hvaða farveg þetta fer og það er hans á leiða málið til lykta. Við vonum bara það besta,“ segir Guðjón.

Maríus telur hinsvegar fullvíst að Icelandair hafi haldið að sér höndum við samningaborðið, vitandi að ríkisstjórnin myndi setja lög á verkfallsaðgerðir flugvirkja. Hann óttast að hið sama verði uppi á tengingnum þegar deilendur setjast niður á nýjan leik.

„Jú, en það myndi kannski afhjúpa það hvernig hlutirnir ganga fyrir sig ef það gerist,“ segir Maríus.

Með því að afturkalla verkfallsaðgerðirnar í gær hafi flugvirkja verið að senda ríkisstjórninni skýr skilaboð.

„Ég held að ríkisstjórnin ætti að hugsa sig um tvisvar áður en hún tekur svona pantaðar tillögur á dagskrá áður en til aðgerða kemur. Það er ekkert tjón búið að hljótast þannig að þeir ættu að íhuga það alvarlega.“