Redknapp: Rooney verður ekki settur á bekkinn

Harry Redknapp, knattspyrnustjóri QPR, segir WayneRooney vera jafnmikilvægan enska landsliðinu og Steven Gerrard og engin spurning sé um hvort hann eigi að vera í byrjunarliðinu á HM.

Rooney hefur fengið sinn skerf af gagnrýni fyrir frammistöðuna með landsliðinu undanfarin ár en mörgum finnst hann aldrei ná sömu hæðum og hann gerir oft með Manchester United.

Rooney hefur ekki fundið sig á síðustu stórmótum og var baulaður af velli ásamt enska landsliðinu eftir markalaust jafntefli gegn Alsír á HM í Suður-Afríku fyrir fjórum árum.

„Það er alveg klárt mínum huga að Rooney á að byrja hjá Englandi. Hann, og einn til tveir í viðbót, eins og Steven Gerrard og Joe Hart væru fyrstu menn á skýrslu hjá mér,“ segir Redknapp.

„Ég er mikill aðdáandi Rooney. Mér finnst hann frábær leikmaður. Þegar England mætti Brasilíu í vináttuleik í fyrra fannst mér Rooney frábær og við hefðum getað unnið þann leik.“

„Ef þú spyrð mig þá á Rooney að vera í byrjunarliðinu og ég býst ekki við að sjá enskt lið án hans í Brasilíu. En þetta er ákvörðun sem Roy Hodgson þarf að taka,“ segir Harry Redknapp.