Hazard ákveður sig eftir HM

Thierry Hazard, faðir Edens Hazards, leikmanns Chelsea segir að engar fréttir muni berast af syni sínum á meðan HM standi yfir en útilokar þó ekki að eitthvað gerist þegar heimsmeistarakeppninni er lokið.

Belginn spilaði frábærlega fyrir Chelsea á síðustu leiktíð og er Paris Saint-Germain sagt ætla bjóða í hann fúlgur fjár í sumar. Laurent Blanc, þjálfari Frakklandsmeistaranna, er mjög spenntur fyrir Hazard.

PSG var sektað um 60 milljónir evra af UEFA um daginn fyrir brot á fjárhagsreglum sambandins, en eðlilega dregur það úr kaupmætti þess í næstu félagaskiptagluggum.

Samt sem áður er talið að PSG muni bjóða Chelsea háa uppfærð fyrir belgíska landsliðsmanninn sem tilkynnti þó á Twitter í gær að hann hafi fengið treyju númer 10 fyrir næsta tímabil hjá Chelsea.

„Það er uppáhaldsnúmerið mitt. Ég er alltaf númer tíu hjá landsliðinu. Ég vona að þessi treyja færi mér lukku í framtíðinni,“ sagði Hazard.

Sama hvað verður þá tekur leikmaðurinn engar ákvarðanir á meðan heimsmeistarakeppninni stendur. Hann ætlar að einbeita sér að því að koma Belgum eins langt og hægt er.

„Það er ekkert að frétta af Eden núna. Það verða engar fréttir af hans málefnum á meðan HM stendur. Hann vill bara einbeita sér að mótinu,“ segir Thierry Hazard, faðir Edens.