Segir Mourinho vera brúðu

Samuel Eto'o er enn sótillur vegna ummæla knattspyrnustjórans Jose Mourinho hjá Chelsea um aldur sinn.

Ummæli Mourinho áttu ekki að rata í fjölmiðla en náðust á upptöku í febrúar síðastliðnum. Þá gaf Mourinho í skyn að Eto'o væri í raun eldri en væri uppgefið.

Líklegt er að Eto'o sé á leiðinni frá Chelsea en hann skoraði fjórtán mörk í öllum keppnum í vetur. Hann tjáði sig fyrst um málið í síðustu viku og kallaði þá Mourinho fífl.

„Ég er enn í góðu formi sama hvað brúðan segir um aldurinn minn,“ sagði Eto'o í samtali við fjölmiðla í heimalandinu Kamerún. „Mér líður mjög vel og hef sannað að ég get staðið mig betur en yngri leikmenn.“

„Ég vil líka taka fram að ég er ekki á leið til Bandaríkjanna eða miðausturlanda. Ég vil halda áfram að spila í hæsta gæðaflokki. Ég ætla að spila áfram í Meistaradeildinni,“ bætti Eto'o við.

„Ég er 33 ára gamall og ætla að spila á tveimur HM-keppnum til viðbótar. Margir hafa spilað til 41 árs og ég sé enga ástæðu til að ætla annað en að ég geti gert slíkt hið sama.“