Þarf ekki að útskýra aldurinn

Samuel Eto'o gefur lítið fyrir umræðu sem hefur skapast um aldur hans eftir ummæli Jose Mourinho, knattspyrnustjóra Chelsea.

Mourinho gantaðist með aldur Eto'o í einkasamtali á dögunum en ummæli hans rötuðu í fjölmiðla. „Vandamálið hjá Chelsea er að okkur vantar markaskorara. Við erum reyndar með Eto'o en hann er 32 ára. Kannski er hann 35 ára - hver veit?“ sagði Mourinho.

„Ég þarf ekkert að útskýra,“ sagði Eto'o eftir 1-1 jafntefli Chelsea gegn Galatasaray í fyrri leik liðanna í 16-liða úrslitum Meistaradeildar Evrópu í gær.

„Ég hef unnið sigra með öllum liðum sem ég hef spilað með. Ég er sá leikmaður sem ég er og vil hjálpa Chelsea að vinna bikar á þessu ári,“ sagði Eto'o.