Dortmund og Man. Utd gætu skipt á leikmönnum

Það ríkir mikil óvissa um framtíð Japanans Shinji Kagawa hjá Man. Utd en svo gæti farið að hann endi aftur hjá sínu gamla félagi, Borussia Dortmund.

Hermt er að leikmaðurinn vilji komast aftur til Dortmund enda hefur hann engan veginn fundið sig hjá United.

Enska liðið er í miðvarðaleit og kemur því til greina að liðin skiptist á leikmönnum. Kagawa færi til Dortmund og miðvörðurinn Mats Hummels til United.

Jürgen Klopp, þjálfari Dortmund, heldur mikið upp á Kagawa og er til í að fórna ýmsu til þess að fá hann aftur enda hefur hann þurft að horfa á eftir mörgum stórstjörnum liðsins síðustu ár.