Pochettino ráðinn stjóri Tottenham

Enska úrvalsdeildarfélagið Tottenham staðfesti nú rétt í þessu að Argentínumaðurinn Mauricio Pochettino hafi verið ráðinn sem knattspyrnustjóri félagsins.

Pochettino kemur til Tottenham frá Southampton þar sem hann hefur gert góða hluti undanfarna 18 mánuði en undir hans stjórn endaði liðið í 8. sæti í ensku úrvalsdeildinni á nýliðinni leiktíð.

Tottenham hefur viljað fá Pochettino til sín alveg síðan það rak TimSherwood í lok leiktíðar en Sherwood tók við starfinu þegar André Villas-Boas var rekinn í desember.

Pochettino, sem er 42 ára gamall, þjálfaði áður spænska liðið Espanyol en hann átti einnig fínan feril sem leikmaður hjá Newell's Old Boys í Argentínu og síðar með Espanyol og fleiri liðum.

„Þetta er félag með mikla sögu og það er heiður að fá tækifæri til að vera yfirþjálfari þess. Hópurinn er fullur af frábærum leikmönnum og ég hlakka til þess að vinna með þeim,“ segir Mauricio Pochettino.

The Club is delighted to announce the appointment of Mauricio Pochettino as our new Head Coach on a five-year contract.

— Tottenham Hotspur (@SpursOfficial) May 27, 2014