Rodgers: Við óttumst ekkert

Brendan Rodgers, knattspyrnustjóri Liverpool, ætlar ekki að breyta leikstíl liðsins þrátt fyrir að missa af enska meistaratitlinum sem félagið hefur beðið í 24 ár eftir að vinna.

Liverpool barðist um titilinn við Manchester City allt til lokaflauts í ár en eftir 2-0 sigur þeirra heiðbláu á West Ham í gær var það ljóst að lærisveinar Manuels Pellegrini eru meistarar í annað sinn á þremur árum.

Liverpool fór hamförum í sóknarleiknum á tímabilinu og skoraði 101 mark en varnarleikurinn kostaði liðið titilinn á endanum. Það fékk á sig 50 mörk.

Þrátt fyrir það ætlar Rodgers ekkert að draga úr sóknarleiknum á næstu leiktíð. Stefnt er að því að halda áfram að raða inn mörkum á Anfield en varnarleikurinn mun styrkjast sjálfkrafa með komu nýrra leikmanna.

„Við spilum áfram til sigurs. Þeirri hugmyndafræði verður ekki breytt á næstu leiktíð. Við óttumst ekkert. Við erum búnir að koma félaginu aftur á þann stall sem það á að vera. Þetta var frábært tímabil fyrir okkur,“ segir Brendan Rodgers.

„Við vitum að það eru hlutir sem við þurfum að bæta og við verðum betri. Við munum mæta til leiks á næstu leiktíð í góðu formi, bæði á líkama og sál. Þetta er ungur hópur og við munum bæta við leikmönnum til að geta tekið slaginn aftur,“ segir Brendan Rodgers.