Wilshere og Gibbs að verða klárir í slaginn

Arsenal á von á að klára tímabilið með sterkara lið enda eru tveir sterkir menn að snúa aftur eftir meiðsli.

Arsene Wenger, stjóri Arsenal, segir að þeir Jack Wilshere og Kieran Gibbs séu að verða klárir í slaginn á nýjan leik.

Wilshere hefur verið frá í tvo mánuði vegna meiðsla sem hann hlaut í landsleik.

"Það er mjög stutt í að báðir þessir drengir fari að æfa með okkur á nýjan leik. Við viljum klára mótið með stæl og því er gott að fá þá inn," sagði Wenger.

Arsenal á heimaleik gegn WBA um helgina. Arsenal hefur aðeins tapað einum heimaleik á tímabilinu.

"Næsti leikur er alltaf mikilvægasti leikurinn og þetta er síðasti heimaleikurinn. Við viljum að sjálfsögðu vinna hann."