Enski boltinn | Fulham og Cardiff féllu

Fulham og Cardiff féllu úr ensku úrvalsdeildinni í dag. Bæði liðin töpuðu sínum leikjum og vegna sigurs Sunderland á Manchester United á sama tíma var ljóst að hvorugt þeirra gat náð Sunderland að stigum.

Peter Odemwingie kom Stoke yfir gegn Fulham á Brittania Stadium með marki sex mínútum fyrir leikhlé, en hann hefur reynst Stoke drjúgur frá því hann kom frá West Brom í janúarglugganum.

Odemwingie var svo aftur á ferðinni á 54. mínútu þegar hann lagði upp mark fyrir Marko Arnautovic sem kom Stoke í 2-0. Oussama Assaidi, lánsmaður frá Liverpool, skoraði þriðja markið á 73. mínútu, áður en Kieran Richardson lagaði stöðuna sjö mínútum síðar. Það var svo varamaðurinn Jon Walters sem negldi síðasta naglann í kistu Fulham-manna þegar hann skoraði fjórða mark Stoke á 82. mínútu.

Newcastle náði forystunni gegn Cardiff á 18. mínútu þegar Shola Ameobi skoraði með skalla eftir fyrirgjöf frá Moussa Sissoko. Sá síðarnefndi var aðgangsharður við upp mark Cardiff í leiknum, en hann átti tvö skot í stöngina í fyrri hálfleik.

Loic Remy og Steven Taylor bættu svo við mörkum í síðari hálfleik og Newcastle-menn fögnuðu því langþráðum sigri, en fyrir leikinn liðið tapað sex leikjum í röð. Gengi Newcastle á árinu 2014 hefur verið ömurlegt og stór hópur stuðningsmanna liðsins sýndi ónægju sína í verki þegar hann yfirgaf St. James' Park á 69. mínútu, en það var árið 1969 sem Newcastle vann síðast stóran titil.

Aston Villa bjargaði sér endanlega frá falli með 3-1 sigri á Hull City á heimavelli. Ashley Westwood kom Aston Villa yfir á upphafsmínútu leiksins, en þetta var 1000. markið sem hefur verið skorað á Villa Park síðan enska úrvalsdeildin var sett á laggirnar tímabilið 1992-93.

Gestirnir jöfnuðu á 28. mínútu þegar varamaðurinn Jordan Bowery setti boltann í eigið mark, en heimamenn náðu forystunni á nýjan leik fjórum mínútum fyrir leikhlé þegar Andreas Weimann skallaði boltann í netið af stuttu færi.

Weimann var svo aftur á ferðinni á lokamínútu fyrri hálfleiks þegar hann skoraði með skalla eftir fyrirgjöf frá áðurnefndum Bowery.

Þá tryggði Rickie Lambert Southampton 1-0 útisigur á Swansea með marki á 90. mínútu.

Úrslit dagsins:

West Ham 2-0 Tottenham

Aston Villa 3-1 Hull City

Stoke City 4-1 Fulham

Newcastle 3-0 Cardiff City

Swansea City 0-1 Southampton

Manchester United 0-1 Sunderland