Giggs: Flöt frammistaða

Það gekk ekki jafnvel hjá Manchester United í öðrum leik liðsins undir stjórn Ryans Giggs sem tók við liðinu til bráðabirgða eftir að David Moyes var vikið úr starfi. United tapaði fyrir Sunderland á Old Trafford í dag með einu marki gegn engu, en spilamennska liðsins í leiknum var ekki upp á marga fiska.

"Þetta var flöt frammistaða. Leikmennirnir voru flatir og ég veit ekki af hverju. Sunderland á hrós skilið, þeir hafa verið að spila vel og sköpuðu sér bestu færin í leiknum. Það vantaði gæði hjá okkur á síðasta þriðjungi vallarins."

"Við vorum að klúðra nokkurra metra sendingum og þegar þú gerir það í ensku úrvalsdeildinni er þér refsað. Við höfum verið í vandræðum á heimavelli allt tímabilið, þetta hefur ekki verið nógu gott," sagði Giggs en Manchester United hefur nú tapað sjö leikjum á heimavelli á tímabilinu.

"Ég get ekkert upplýst um næsta þjálfara. Ég einbeiti mér bara að næsta leik. Gæðin í liðinu eru enn til staðar, en við sýndum þau ekki í dag," sagði Giggs að endingu.