Pellegrini: "Stigum stórt skref í dag"

"Við stigum mjög stórt skref í dag. Everton eru erfiðir viðureignar á heimavelli. Leikmenn Everton lögðu sig alla fram og þetta var mjög erfiður leikur," sagði Manuel Pellegrini, þjálfari Manchester City, eftir sigur hans manna á Everton í dag.

"Við unnum og það er það mikilvægasta. Spennustigið var kannski of hátt til að við gætum spilað okkar besta leik. Það er ekki auðvelt að lenda undir og koma til baka, en okkur tókst það."

"Þegar tímabilið er búið munum við meta frammistöðu leikmannanna. Joe Hart varði nokkrum sinnum mjög vel en allt liðið spilaði af miklum krafti gegn erfiðu liði."

City er nú í kjörstöðu til að tryggja sér Englandsmeistaratitilinn, en með sigrinum á Everton komst liðið á topp deildarinnar.

"Það versta sem við getum gert er að halda að við höfum unnið ensku úrvalsdeildina. Við verðum að reyna að byrja að hugsa um leikinn gegn Aston Villa strax á morgun og sjá svo til hvað gerist," sagði Pellegrini að lokum.