Suarez óhuggandi í leikslok - myndband og myndir

Luis Suarez, markahæsti leikmaður ensku úrvalsdeildarinnar og besti leikmaður ársins að mati bæði leikmanna og blaðamanna, var algjörlega niðurbrotin eftir 3-3 jafntefli við Crystal Palace í kvöld.

Luis Suarez kom Liverpool í 3-0 á 55. mínútu og hann og félagar hans gátu bætt við fleiri mörkum en fengu síðan á sig þrjú mörk á síðustu fimmtán mínútum leiksins.

Mörkin sex úr leiknum á Selhurst Park í kvöld má sjá með því að smella hér.

Með þessu jafntefli kastaði Liverpool hreinlega frá sér möguleikanum á því að vinna enska meistaratitilinn þrátt fyrir að vera með eins stigs forskot á Manchester City. City-liðið á eftir tvo heimaleiki og verður meistari með því að vinna þá báða.

Luis Suarez gerði sér vel grein fyrir þessu í leikslok ef marka má viðbrögð hans en hann hágrét og það dugði lítið hjá liðsfélögum hans að reyna að hugga Úrúgvæmanninn.

Það má sjá myndband af þessari miklu dramatík hér fyrir ofan og hér fyrir neðan eru einnig myndir frá Getty-myndabankanum.