Tottenham segist ekki hafa talað við Ajax út af De Boer

Enskir fjölmiðlar fullyrtu í gær að Tottenham væri búið að hafa samband við Ajax og biðja um leyfi til þess að ræða við þjálfara félagsins, Frank de Boer.

Talsmaður Tottenham segir að þessar fréttir séu algjörlega úr lausu lofti gripnar.

"Þessar fréttir eru einfaldlega ekki sannar. Við höfum ekki haft samband við neitt félag. Það er miður að þurfa að gefa út svona tilkynningu en í þessu tilfelli neyðumst við til þess," sagði talsmaðurinn.

Talsmaður Ajax hafði aftur á móti tjáð BBC að Spurs hefði talað við Marc Overmars, yfirmann knattspyrnumála hjá Ajax, fyrir mánuði síðan út af De Boer.

Tim Sherwood er með samning við Spurs út næstu leiktíð en líklegt er að hann fái að fjúka í sumar.