Stuðningsmenn Arsenal hafa fengið nóg af græðgi eigandans

Stuðningsmenn Arsenal ætla að láta í sér heyra á sunnudag enda eru þeir afar óánægðir með nýjasta útspil eiganda félagsins, Stan Kroenke.

Hann hefur boðað þriggja prósenta hækkun á miðaverði á næstu leiktíð. Stuðningsmenn Arsenal saka Kroenke um græðgi og hafa fengið nóg.

Mótmælin verða fyrir utan Emirates-völlinn fyrir leik liðsins gegn WBA.

Stuðningsmennirnir segja að hvergi sé dýrara að fara á leiki en hjá Arsenal. Það kostaði til að mynda rúmar 23 þúsund krónur að sjá bikarleik gegn neðrideildarliði á þessu tímabili.

Ódýrustu miðarnir á þá leiki fóru á 12 þúsund krónur. Önnur félög eru sveigjanlegri með miðaverð ef andstæðingurinn er ekki sérstaklega sterkur.

Ársmiði á leiki Arsenal er mun dýrari en hjá hinum stóru liðunum á Englandi.