Giggs þakkaði Moyes

Ryan Giggs hóf sinn fyrsta blaðamannafund sem knattspyrnustjóri Manchester United með því að þakka David Moyes fyrir.

Fyrir fundinn, sem hófst klukkan 09.00 í morgun, var blaðamönnum þó gert ljóst að þeim væri ekki heimilt að spyrja neinna spurninga um brottrekstur Moyes.

„Ég vil þakka David Moyes fyrir að gefa mér mitt fyrsta tækifæri í þjálfun,“ sagði Giggs sem stýrir nú liði United þar til að nýr knattspyrnustjóri verður ráðinn til félagsins.

Moyes var rekinn á þriðjudagsmorgun eftir aðeins tíu mánuði í starfi en gengi United hefur valdið vonbrigðum í vetur. Liðið er í sjöunda sæti deildarinnar og ljóst að liðið kemst ekki í Meistaradeild Evrópu á næstu leiktíð.

„Þetta hefur verið pirrandi tímabil en æfingar hafa gengið vel í vikunni og leikmennirnir beittir,“ sagði Giggs enn fremur. Hann segist stoltur af því að fá að stýra liðinu nú.

„Ég hef aldrei verið jafn stoltur á ferlinum. Ég vil fá fólkið til að brosa á ný,“ sagði Giggs sem er sigursælasti leikmaður Manchester United frá upphafi.

Hann var spurður hvort að hann vilji fá fastráðningu sem stjóri United. „Ég er bara að einbeita mér að leiknum gegn Norwich [á morgun]. Ég hef í raun ekkert leitt hugann að því sem kemur næst.“

„Liðið mun spila eftir minni hugmyndafræði - þeirri sömu og Manchester United hefur notað. Það verður ástríða, hraði, hugrekki og sköpunargleði. Strákarnir verða að leggja mikið á sig en fyrst og fremst njóta þess að spila.“

Hinn fertugi Giggs er enn að spila með United en kom sér undan því að svara hvort hann myndi setja sjálfan sig í byrjunarliðið. „Ég er stjórinn núna þannig að ég hlýt að gefa mér nýjan fimm ára samning,“ sagði hann í léttum dúr.