Enski boltinn | Fulham missti niður tveggja marka forystu

Fjórum leikjum er nýlokið í ensku úrvalsdeildinni.

Fulham og Hull City skildu jöfn, 2-2, á Craven Cottage. Varamaðurinn Ashkan Dejagah kom Fulham yfir á 55. mínútu og aðeins þremur mínútum síðar bætti varnarmaðurinn Fernando Amorebieta við marki.

Króatinn Nikica Jelavic náði að minnka muninn þegar 15 mínútur voru eftir af leiknum og það var síðan Shane Long sem jafnaði leikinn á 87. mínútu, en skömmu áður hafði David Stockdale, markvörður Fulham, varið skot Ahmeds Elmohamady í stöngina. Fulham, sem hefði komist úr fallsæti með sigri, situr í 18. sæti, stigi á eftir Norwich sem mætir Manchester United eftir tæpan hálftíma.

Saido Berahino var hetja West Brom þegar liðið bar sigurorð af West Ham á heimavelli. Hann skoraði eina mark leiksins á 11. mínútu eftir fyrirgjöf frá Morgan Amalfitano. West Ham fékk góð færi til að skora í leiknum, en Ben Foster var vel á verði í marki West Brom auk þess sem sláin kom heimamönnum til bjargar í seinni hálfleik þegar Andy Carroll skallaði að marki. West Brom situr í 15. sæti með 36 stig - fimm stigum frá fallsæti - og West Ham sæti ofar með 37 stig.

Þá vann Swansea sigur á Aston Villa á heimavelli með fjórum mörkum gegn einu. Wilfried Bony kom Walesverjunum yfir eftir tíu mínútna leik eftir sendingu frá Jonjo Shelvey, en Gabriel Agbonlahor jafnaði leikinn tólf mínútum síðar eftir fyrirgjöf frá Marc Albrighton.

Á 26. mínútu skoraði Shelvey síðan glæsilegt mark þegar hann skaut boltanum á lofti, nánast við miðju, yfir markvörðinn Brad Guzan og í markið. Pablo Hernandez bætti svo þriðja marki Swansea við þegar tæpar 20 mínútur voru eftir af leiknum og Bony gulltryggði sigurinn með sínu öðru marki úr vítaspyrnu á lokamínútunni.

Með sigrinum komst Swansea upp í 12. sæti deildarinnar. Aston Villa er hins vegar í vondum málum í 16. sæti, þremur stigum frá fallsæti, en liðið hefur aðeins fengið eitt stig í síðustu sex leikjum sínum.

Úrslit dagsins:

Stoke City 0-1 Tottenham

Fulham 2-2 Hull City

West Brom 1-0 West Ham

Swansea 4-1 Aston Villa