Wenger hefur áhyggjur af framtíð þjálfara

Arsene Wenger, stjóri Arsenal, segir að tíð þjálfaraskipti í knattspyrnuheiminum komi til með að bitna á gæðum þjálfara í framtíðinni.

David Moyes var í vikunni rekinn úr starfi knattspyrnustjóra Manchester United en alls hafa stjórar tíu liða í ensku úrvalsdeildinni þurft að taka poka sinn.

„Ef þú vilt hæft fólk í starfið verðurðu að gefa því tíma til að þróast,“ sagði Wenger á blaðamannafundi í morgun.

„Þjálfarar þurfa tíma til að verða góðir og sem stendur endast þjálfarar um ellefu mánuði í hverju starfi að meðaltali. Stöðugleikinn er því ekki mikill.“

„Ég er viss um að fólk sem hefur fjölskyldu á sínu framfæri hiki við að fara út í þennan bransa. Það mun á endanum bitna á gæðum þjálfunnar í framtíðinni.“