Mirallas: Januzaj á ekki að fara með til Brasilíu

Ungstirnið Adnan Januzaj, leikmaður Manchester United, gaf nýlega kost á sér í belgíska landsliðið eftir miklar vangaveltur um hvaða landslið hans hyggðist spila fyrir í framtíðinni. Januzaj, sem er fæddur í Belgíu, átti einnig möguleika á að spila fyrir landslið Albaníu, Kosovo, Serbíu, Tyrklands og Englands.

Belgíski landsliðsmaðurinn Kevin Mirallas kveðst ánægður með val Januzaj, en telur jafnframt að hann eigi ekki að vera í belgíska hópnum sem fer á HM í Brasilíu í sumar.

"Hann var undir mikilli pressu að ákveða sig, og það er gott fyrir Belgíu að hann skyldi velja landsliðið, því hann er góður leikmaður," sagði Mirallas, sem hefur leikið 43 landsleiki fyrir Belgíu og skorað níu mörk.

"En ég tel að hann eigi ekki að fara til Brasilíu. Það væri ekki sanngjarnt að skilja annan góðan leikmann eftir heima fyrir einhvern sem þekkir ekki leikmannahópinn og hefur ekki spilað mikið fyrir félagslið sitt að undanförnu."

"Það er ekki eins og við séum á flæðiskeri staddir með sóknarleikmenn. Það eru margir góðir leikmenn í hans stöðu til staðar í belgíska landsliðinu, svo það verður erfitt fyrir hann að komast að," sagði Mirallas, sem mun missa af þeim fjórum leikjum sem Everton á eftir að spila í ensku úrvalsdeildinni. Þó er talið að hann muni verða tilbúinn í slaginn þegar HM hefst.

Belgía leikur í riðli með Alsír, Rússlandi og S-Kóreu á HM í sumar.