Inter með augastað á Sagna, Dzeko og Torres

Erick Thohir, forseti Inter á Ítalíu, stefnir að því að styrkja leikmannahóp liðsins verulega í sumar.

Hann staðfestir áhuga sinn á bakverðinum Bacary Sagna en samningur hans við Arsenal rennur út í sumar.

„Ég vil ekki tjá mig um ókláruð mál og segi aðeins að við erum hrifnir af honum og nú er það undir honum komið að taka ákvörðun,“ sagði Thohir. „Ef hann kemur ekki þá tökum við yngri bakvörð.“

Sagna er 31 árs gamall og á enn í viðræðum við Arsenal um nýjan samning. Hann hefur einnig verið orðaður við bæði Manchester City og Chelsea.

Thohir segist einnig vilja styrkja fremstu víglínu liðsins og horfir líka til Englands í þeim efnum. Hann var spurður um áhuga hans á Fernando Torres og Edin Dzeko.

„Þetta eru nöfn sem ég heyri líka. Kannski kemur einn af þeim en sá hinn sami verður að sætta sig við þau laun sem við getum greitt.“