Borðinn fer ef Man. Utd misstígur sig í kvöld

Pressan eykst á David Moyes, stjóra Man. Utd, með hverjum leik. Falli Man. Utd úr leik í Meistaradeildinni í kvöld eru taldar vera líkur á því að honum verði sparkað úr starfi.

Þó svo stuðningsmenn Man. Utd hafi reynt að sýna honum stuðning þá er töluverður fjöldi búinn að fá nóg. Ef United kemst ekki áfram í Meistaradeildinni í kvöld þá ætlar hópur stuðningsmanna félagsins að rífa niður "The Chosen One" borðann í stúkunni á Old Trafford.

Það var fráfarandi stjóri félagsins, Sir Alex Ferguson, sem handvaldi Moyes sem arftaka sinn og því hefur Moyes gengið undir viðurnefninu hinn útvaldi.

Í nýlegri könnun kemur síðan fram að flestir stuðningsmenn félagsins kenna Ferguson um stöðu mála hjá félaginu. Það hafi verið hann sem valdi Moyes og því beri hann mesta ábyrgð á falli félagsins í vetur.

Haldi Moyes starfinu út vikuna þá bíða hans fleiri erfið verkefni. United á leik gegn West Ham um helgina og svo er leikur gegn Man. City næsta þriðjudag. Niðurlæging þar myndi líklega fylla mælinn endanlega hjá ansi mörgum stuðningsmönnum félagsins.