Solskjær er ekki hræddur við breytingar

Cardiff City vann í gær sinn fyrsta sigur í fimm leikjum þegar liðið lagði Fulham að velli 3-1 á heimavelli.

Ole Gunnar Solskjær hefur verið óhræddur að gera breytingar frá því hann tók við liði Cardiff byrjun árs. Alls hefur Norðmaðurinn notað 25 leikmenn í þeim tólf leikjum sem hann hefur stýrt liðinu í og fyrir leikinn gegn Fulham gerði hann þrjár breytingar á byrjunarliðinu.

Landsliðsfyrirliðinn Aron Einar Gunnarsson, ásamt Craig Bellamy og Juan Cala, var tekinn út úr liðinu og inn í þeirra stað komu Jordon Mutch, Kenwyne Jones og Craig Noone.

Solskjær lét mannabreytingarnar ekki nægja og skipti einnig um leikaðferð. Í tapleiknum gegn Tottenham um síðustu helgi spilaði Cardiff leikkerfið 5-3-2, en gegn Fulham skipti Solskjær yfir í 4-3-3.

„Þú velur liðið og leikaðferðina með hliðsjón af andstæðingnum,“ sagði Solskjær eftir leikinn á laugardag. „Mér fannst okkur ganga stórkostlega að spila kerfið gegn Spurs og við gætum beitt því aftur.“

„Í dag fórnaði ég miðverði og spilaði með þrjá framherja því stundum verður þú að fylgja eðlisávísuninni og ég var mjög ánægður með hvernig til tókst,“ sagði Norðmaðurinn ennfremur.

Solskjær ræddi einnig um komandi átök í botnbaráttunni: „Við verðum að trúa að við getum fengið eitthvað út úr leiknum á Goodison Park um næstu helgi. Það er svo jöfn barátta á botninum og það eru enn mörg lið sem eru enn í fallhættu.“

Cardiff situr í 18. sæti þegar níu leikir eru eftir af deildinni, með jafn mörg stig og West Brom en lakari markatölu.