Auðvelt hjá Swansea í baráttunni um Wales

Swansea vann góðan 3-0 sigur á Cardiff í slag velsku liðanna í ensku úrvalsdeildinni nú síðdegis.

Aron Einar Gunnarsson var ekki í leikmannahópi Cardiff sem fékk öll þrjú mörkin á sig í síðari hálfleik.

Wayne Routledge kom Swansea á bragðið snemma í síðari hálfleik eftir sendingu Pablo Hernandez. Þeir Nathan Dyer og Wilfried Bony skoruðu hin mörk heimamanna á síðasta stundarfjórðungnum.

Þetta var fyrsti sigur liðsins undir stjórn Garry Monk en hann tók við starfinu eftir að Michael Laudrup var rekinn í vikunni.

Swansea komst upp í tíunda sæti deildarinnar en liðið er með 27 stig. Cardiff er hins vegar enn í nítjánda sætinu með 21 stig.