Di Maria nýtur hörkunnar í enska boltanum

Argentínski sóknartengiliðurinn Angel di Maria hjá enska úrvalsdeildarliðinu Manchester United segist njóta hörkunnar og hraðans í ensku úrvalsdeildinni.

Man. Utd. keypti Di Maria frá Real Madrid á 59,7 milljónir punda í ágúst og var valinn leikmaður mánaðarins hjá félaginu í september.

„Það er meiri harka í fótboltanum hér og styrkur skiptir miklu máli,“ sagði Di Maria um muninn á ensku deildinni og þeirri spænsku.

„Það er meiri kraftur í leikmönnum hér og þeir sýna styrk sinn meira. Þetta er önnur deild og þetta snýst um að aðlagast eins fljótt og hægt er.

„Það hafa verið aðrir leikmenn með svipaða líkamsbyggingu og ég, grannir ef svo má segja, og sýnt líkamlegan styrk til að endast hér og ég vona að ég geri það líka.

„Aðalatriðið er að ég er ánægður hér. Ég hef alltaf viljað leika í þessari deild og ég er yfir mig ánægður með að leika með Manchester United og vonandi verð ég hér lengi,“ sagði Argentínumaðurinn.

Reikna má með því að Di Maria verði í liði Manchester United sem tekur á móti Everton í beinni útsendingu Stöðvar 2 Sport 2 í dag klukkan 11.