Mourinho neitaði enska landsliðinu

Jose Mourinho íhugaði að taka við enska landsliðinu stuttu eftir að liðinu mistókst að komast á Evrópumótið 2008.

Mourinho var án starfs þegar enska liðinu undir stjórn Steve McClaren mistókst að komast á EM 2008. Mourinho var orðaður við stöðuna en á endanum tók Ítalinn Fabio Capello við enska liðinu.

Mourinho viðurkenndi að hann hefði íhugað að taka við enska landsliðinu. Í starfslokasamning sínum við Chelsea kom fram að hann mátti ekki taka við öðru ensku úrvalsdeildarliði á næstu tveimur árum.

„Lampard, Terry, Cole og fleiri báðu mig um að íhuga þetta starf. Það var margt jákvætt við starfið en konan mín sagði mér að bíða og hún hafði rétt fyrir sér. Ég er ekki tilbúinn til þess að verða landsliðsþjálfari núna, kannski eftir fimmtán ár.“

„Ég get ekki eytt tímanum að bíða eftir stórmóti í tvö ár með leikjum gegn Kazakhstan og San Marinó. Hvað ætti ég að gera á daginn? Ég gæti ekki verið heima, ég þyrfti að vera á ferðinni. Sem betur fer benti konan mín mér á að án reglulegra fótboltaleikja er ég ekki sami maður,“ sagði Mourinho.