Rólegt á Old Trafford í dag

David Moyes, stjóri Manchester United, hefur útilokað að félagið muni kaupa leikmenn í dag. Þá er Shinji Kagawa ekki á förum.

Lokað verður fyrir félagaskipti í Englandi klukkan 23.00 í dag en Moyes sagði á blaðamannafundi í dag að félagið myndi ekki standa í neinum viðskiptum fyrir þann tíma.

United keypti Juan Mata frá Chelsea fyrir metfé á dögunum en félagið gekk reyndar frá sölu á bakverðinum Fabio til Cardiff City auk þess sem Wilfried Zaha var lánaður til sama félags til loka tímabilsins.

Moyes sagði einnig að stefnt væri því að lána unga og efnilega leikmenn, líkt og Zaha, til annarra félaga fyrir kvöldið. Larnell Cole og Ryan Tunnicliffe hafa verið nefndir í enskum fjölmiðlum í því samhengi.

Einn þeirra sem er ekki á útleið á Old Trafford er Japaninn Kagawa, sem hefur lítið fengið að spila á tímabilinu. Það sagði umboðsmaður hans í samtali við enska fjölmiðla í dag.