Wenger mun framlengja samning sinn við Arsenal

Ivan Gazidis, framkvæmdarstjóri Arsenal, sagði í dag að Arsene Wenger verði áfram knattspyrnustjóri liðsins næstu árin.

„Hann mun skrifa undir nýjan samning og það verður tilkynnt á viðeigandi tíma,“ sagði Gazidis í dag en þá var nýr samstarfssamningur félagsins við Puma kynntur.

Wenger er 64 ára gamall og hefur starfað sem knattspyrnustjóri Arsenal síðan 1996. Liðið hefur þrívegis orðið Englandsmeistari undir hans stjórn en Wenger hefur reyndar ekki unnið stóran titil síðan 2005.

Liðið er þó í efsta sæti ensku úrvalsdeildarinnar sem stendur og hefur unnið sjö af tíu síðustu deildarleikjum sínum.