Þúsundasti leikur Arsene Wenger með Arsenal á laugardaginn

Arsene Wenger, knattspyrnustjóri Arsenal, stýrir Arsenal-liðinu í þúsundasta sinn á laugardaginn þegar Arsenal heimsækir Chelsea á Stamford Bridge í ensku úrvalsdeildinni á laugardaginn.

Wenger var 46 ára gamall þegar hann tók við liði Arsenal í október 1996 en fyrsti leikur hans var á móti Blackburn og vannst 2-0. Wenger verður 65 ára í október.

Arsenal hefur unnið 579 af leikjunum 999 eða 58 prósent. Tapleikirnir eru orðnir 197 talsins en markatalan er 884 mörk í plús (1845-961)

Arsenal hefur unnið ellefu titla undir stjórn Wenger, fjóra bikarmeistaratitla (1997–98, 2001–02, 2002–03 og 2004–05), þrjá meistaratitla (1997–98, 2001–02 og 2003–04) og svo fjóra Samfélagsskildi (1998, 1999, 2002, 2004).

Þúsundasti leikurinn er á móti Chelsea og verður 49 leikur Wenger á móti nágrönnum sínum í London (19 sigrar, 13 jafntefli, 16 töp). Wenger hefur bara stýrt Arsenal oftar á móti einu liði en það er Manchester United (51 leikur).

Arsenal þarf nauðsynlega á sigri að halda í þessum tímamótaleik í baráttunni við Chelsea, Manchester City og Liverpool um enska meistaratitilinn sem félagið hefur ekki unnið í áratug.