Messan: Hvað var Rafael litli að gera á Drogba?

Guðmundur Benediktsson og félagar hans í Messunni fóru yfir níundu umferð ensku úrvalsdeildarinnar í gær og Hjörvar Hafliðason rifjaði meðal annars upp gamalt mark hjá Didier Drogba.

Didier Drogba kom Chelsea í 1-0 á móti Manchester United á Old Trafford sem leit út fyrir að ætla að verða sigurmarkið þar til að United-liðið jafnaði metin í uppbótartíma.

„Þessi maður er alveg þekkt stærð. Þið munið kannski eftir þessu marki," sagði Hjörvar Hafliðason og sýndi mark Drogba í úrslitaleik Meistaradeildarinnar 2012.

„Didier Drogba er líklega sterkasti skallamaður ensku úrvalsdeildarinnar á síðustu tíu árum. Allaveg einn af þeim. Hér fer hann í sitt klassíska hlaup," segir Hjörvar undir endursýningunum á markinu frá 2012.

Hjörvar tók síðan fyrir hvernig liðsmenn Manchester United dekkuðu Didier Drogba í leiknum á sunnudaginn.

„Hvað er Rafael litli að gera á Drogba," spyr Hjörvar en það má sjá alla umfjöllun Messunnar um hvernig United-liðið varðist Drogba í myndbandinu hér fyrir neðan.