Fyrr skal ég dauður liggja en Holden yfirgefi Bolton

Stuart Holden, Bandaríkjamaðurin í liði Bolton í ensku B-deildinni, er að stimpla sig inn sem einn af óheppnustu knattspyrnumönnum heims þegar kemur að meiðslum og fjarveru vegna þeirra.

Þessi 28 ára gamli leikmaður hefur aðeins spilað fimm leiki fyrir Bolton á síðustu þremur árum en í mars 2011 tæklaði Jonny Evans, leikmaður Manchester United, Holden svo hressilega að Bandaríkjamaðurinn meiddist illa á hné.

Holden var lengi frá vegna meiðslanna en leyfði aðdáendum sínum að fylgjast með hverju einasta skrefi í endurhæfingunni í gegnum Twitter. Holden er gríðarlega vinsæll hjá Bolton og á marga aðdáendur um allan heim en hann þykir með ljúfari mönnum í boltanum.

Hann sneri fyrst aftur vegna hnémeiðslanna í september 2011 en sú endurkoma entist aðeins í einn leik. Aftur var hann frá vegna meiðsla fram á sumar 2012 en þá sleit hann krossband í landsleik í júlí það sama ár.

Holden spilaði leik fyrir U21 árs lið Bolton á mánudagskvöldið sem var fyrsti leikur hans síðan síðasta sumar þegar hann meiddist aftur í landsleik. Greyið pilturinn haltraði af velli eftir 23 mínútur og hélt um hægra hnéð. Ekki góðs viti.

„Þetta eru vonbrigði fyrir okkur alla. Við vitum ekki nákvæmlega hvað er að en við höldum þetta séu sömu meiðslin. Hann hittir sérfræðing næsta mánudag,“ sagði Dougie Freedman, knattspyrnustjóri Bolton, í dag.

Samningur Holdens rennur út í sumar en Freedman ætlar ekki að kasta Bandaríkjamanninum fyrir borð. Snúi hann aftur á knattspyrnuvöllinn mun hann spila fyrir Bolton.

„Ég vil gera það öllum ljóst að Stuart Holden verður áfram hjá Bolton í einhverri mynd. Fyrr skal ég dauður liggja en hann yfirgefi félagið. Hann er einstakur strákur og frábær sendiherra fyrir félagið. Maður hefur ekkert að gera við menn sem hrifsa bara til sín. Ekki einu sinni hefur hann talað við mig um samningsmál sín eða meiðslin. Hann talar bara um hvernig við getum bætt okkur sem lið, gert ungu strákana betri og unnið leiki. Svona menn vil ég hafa í kringum mig,“ sagði Dougie Freedman.