Viltu hitta og fá áritun frá Robbie Fowler í dag?

Robbie Fowler, markavélin frá Liverpool, er Íslandi þessa helgina þar sem hann er heiðursgestur á árshátíð Liverpool-klúbbsins sem fagnar 20 ára afmæli sínu í ár.

Eins og vanalega er fyrir löngu uppselt á árshátíðina en stuðningsmönnum Liverpool, sem og öðrum, gefst kostur á að hitta kappann í versluninni React í Bæjarlind 4 í Kópavogi í dag milli 11 og 13.

Þar mun Guð, eins og Liverpool-menn kalla Fowler, árita treyjur og annan varning fyrir þá sem vilja auk þess sem hægt verður að fá af sér mynd með þessum mikla markahrók.

Hann mun svo horfa á leik Liverpool og Cardiff á skemmtistaðnum Spot í Kópavogi þar sem einnig gefst tækifæri til að fá áritun og/eða mynd af sér með Robbie Fowler.

"Við skorum því á ykkur að nýta þetta einstaka tækifæri til að sjá eina af goðsögnum Liverpool með eigin augum," segir á heimasíðu Liverpool á Íslandi.