Benitez: Við vorum ekkert að rífast

Í gær bárust fréttir af því að Rafa Benitez, stjóri Chelsea, hefði lent í harkalegu rifrildi við leikmenn félagsins eftir tapið gegn Man. City um síðustu helgi.

Hermt var að samband Benitez og fyrirliðans John Terry væri slæmt en stjórinn vísar öllu slíku á bug.

"Þetta var ósköp eðlilegur fundur hjá leikmönnum og þjálfurum. Svona fundur á sér stað eftir hvern einasta leik. Þetta var eðlilegur fundur og ekkert annað," sagði Spánverjinn.

"Ég skil vel að Terry sé svekktur. Hann er lykilmaður sem er að reyna að hjálpa. Hann vill alltaf vinna en er búinn að vera mikið meiddur.

"Við verðum að fara varlega með hann rétt eins og aðra leikmenn. Þetta voru stutt skoðanaskipti og ekkert annað. Samband mitt og leikmannanna er frábært. Það eru engin vandamál."